Boas familias! Esperamos que tiverades unha semana marabillosa... Dende a CLASE DOS SOLES esta semana propónsevos a seguinte actividade, seguindo a liña da proposta da aula das Nubes: PINTAMOS CON PINTURA COMESTIBLE, non tóxica e apta para os máis pequenos. É SUPER DOADO!!! Xa veredes...
Pintar é unha das principais maneiras de permitir aos nenos a liberdade de expresar. Para eles, o contacto coa pintura, poder experimentar con texturas, cores e sabores é unha experiencia que fomentará á súa creatividade, a coordinación óculo-manual e a autoestima. Ensuciarse ou mancharse tamén é aconsellable para o seu desenvolvemento. O primeiro pincel… a súa man e o primeiro lenzo o seu corpo.
Existen diferentes receitas para poder facer na casa a pintura, tende en conta os alimentos que poden tomar nese momento en función da idade.
- Con fariña (p.e. maizena) ou leite en po dos cativos.
- Xelatina de diferentes cores ou sabores.
- Iogur.
- Cereais para bebés (con ou sen glute).
Estas son as mesturas a facer en función da base que escollades:
- Se o facedes con fariña ou leite en po: 480 ml auga, 60g. de fariña ou leite, 7g. de sal, 45g de adozante (se queredes ) e colorantes alimenticios.
- Se o facedes con iogur: só precisades agregarlle o colorantes alimenticios das cores que gustedes (sacalo con antelación, aprox. 30 min antes de usalo).
- Se o facedes con papilla de cereais: agregarlles auga e colorantes á gusto ata atopala o suficientemente consistente.
Agora vos preguntaredes como levamos a cabo a actividade?
Pois ben, vertemos un pouco da pintura nos recipientes. Estendemos o papel branco, tea ou plástico no chan e colocamos os recipientes no medio, deixando liberdade ao neno ou nena para que usen o material como eles considere, senón tamén podedes empregar espazos máis limitados (bañeiras, caixas, trona, ...). Podedes agregar un pouco de auga para mostrarlle que a pintura se volve máis esvaradía, ou mesturar as cores para que vexa como cambian. Para mellor soltura e comodidade podedes sacar a vestimenta do pequeno agás o cueiro!
Tamén podedes entregarlles algún material para estampar, se gustades, como poden ser laranxas, limóns, follas, esponxas,... Ou poñerlles unha cartolina ou lenzo e papel transparente, a ver que cousiñas bonitas fan.
Aquí vos deixamos unha mostra de como facer esta actividade na casa, mediante un vídeo, que sempre axuda para visualizar mellor e aclarar dúbidas.
E por último, deixámosmos un contiño, porque nestas idades xa ha de potenciarse a lectura, non vos esquezades... Este é un dos nosos contiños preferidos. É da Editorial Kalandraka e titúlase "Lúa".
Botámosvos tanto de menos... Ata a vindeira entrada, moitos bicos!
Ningún comentario:
Publicar un comentario